歐聯：留力英超唔敢亂谷阿仙奴細盤好辦士_東方日報

歐聯8強次回合賽事，阿仙奴主場迎戰士砵亭，英超榜首「兵工廠」首回合贏1比0，今仗和波都可以晉級，加上將於下場聯賽生死戰鬥曼城，存在後顧之憂，應會就住踢，避免消耗太多體力。至於士砵亭歐聯作客成績差，恐怕無力收復失地，翻查阿仙奴近5次歐洲賽對葡超球隊，有4次總入球開2球或以下，寧願博中位數2.5球嘅入球細。（Now 638周四凌晨3時直播）文:Mic少

阿仙奴各項賽事近4場輸3仗，包括痛失英聯盃及英足盃錦標，上場英超主場不敵般尼茅夫，爭標形勢告急。領隊阿迪達為求幫球隊「止血」，相信今仗會採取穩陣踢法，但求保住首回合勝果晉級已足夠，冇必要贏波。事實上，「兵工廠」飽受傷兵問題困擾，翼鋒布卡約沙卡、中場馬田奧迪加特、米基爾馬連奴、後衞祖利安添巴、卡拉費奧利都有傷在身，陣容不整情況下，想贏都有心無力。

士砵亭還擊乏力
此外，阿仙奴將於周日晚英超作客第2位曼城，成為聯賽爭標最關鍵一戰，絕對不容有失，所以今場歐聯必須盡量保留體力，以及避免再出現傷兵，隨時用「拉布戰術」悶和收場。

葡超第2位士砵亭整體實力始終同阿仙奴有距離，首回合輸波，被打破各項賽事連續20場主場不敗走勢，就係最佳證明。士砵亭有地利都攻唔入阿仙奴大門，作客入波機會就更加低。睇番士砵亭今屆歐聯5場作客只有1勝1和3負，今仗無力發圍。