沙特職：挾10連勝走勢繼續衝艾納斯高質半大伊絲執_東方日報

今晚沙特職直播重頭戲，伊蒂法克主場火併艾納斯。伊蒂法克上輪順利擊敗艾利雅德，聯賽2連勝下球員士氣旺盛，面對強敵亦唔會退縮；榜首雄師艾納斯上輪憑C朗梅開二度，大炒艾科多3比0，聯賽累積10連勝，而且踢法非常搶韁，各項賽事近4場半場全開2球或以上，1.5球半場大要追捧。（on.cc東網周三凌晨1時30分直播）文:邪神

艾納斯今季表現接近完美，聯賽豪取10連勝之餘，攻入33球遠超其餘各隊，開季18戰獲17勝，唯一瑕疵係喺沙王盃敗於伊蒂哈德腳下出局。佢哋現時聯賽僅領先次席希拉爾4分，爭冠仍然不容鬆懈，球員落到場自然傾盡全力，務求繼續贏落去。

C朗上場起孖腳風順
艾納斯雖有塞內加爾國腳沙迪奧文尼要踢非國盃而暫時離隊，但近兩仗證明對球隊攻力影響唔大，前仗亞冠盃2大炒艾祖拉5比1，上輪聯賽又以3比0輕取艾科多，各主力射手都有數胡能力，其中隊長C朗以身作則，上仗順利「起孖」，今季聯賽上陣9場交出10球及1助攻，佢嘅葡萄牙前鋒拍檔祖奧菲歷斯亦連續兩仗有「士哥」，加埋京士利高文及波索域等進攻好手，可謂火力全開，尤其喺上半場，往往一輪急攻後都有收穫，而且至少攻入2球，難怪經常開出半場大。

佔主場之利嘅伊蒂法克人腳唔曳，由荷蘭國腳中場韋拿杜姆領軍，前鋒線有踢過英超嘅法國射手迪比利掛帥，球隊踢法同樣崇尚進攻，韋拿杜姆喺上輪聯賽重開即有進帳，今晚挑戰聯賽1哥艾納斯，士氣正盛唔會縮住踢，分分鐘一開波就鬥攻，半場大好快夠數。